top of page

葉巧琳為新歌〈史詩式完結〉MV舞火刀燒傷 音樂企畫《The Odyssey of Freya》專輯今日面世

在過去一年,葉巧琳Mischa投入全副心機,炮製屬於她自己,以電子遊戲世界作主題的音樂企畫《The Odyssey of Freya》,來到今天,整個音樂企畫終於來到終章,推出最後一首歌曲〈史詩式完結〉,而專輯亦於今日正式面世。


〈史詩式完結〉是這次Mischa與團隊構想的《The Odyssey of Freya》的故事完結篇,同時亦是音樂企畫的句號。作為完結,Mischa很希望歌曲能有一種史詩式的感覺,於是大家聆聽RPG Game《NieR:Automata》的Soundtrack找靈感,她說:「聽Soundtrack以外,我寫呢首歌之前已有個Idea,好想用之前出現過嘅一段旋律開始成首歌,要有好宏大嘅感覺,於是喺做音樂底嘅同時,我同另外三位音樂人Key Ng、Anson Chan及Y.Siu喺網上搵一啲圖畫去豐富我哋嘅想像,然後我哋搵到一幅圖畫,係一個人嘅背影,遠望一個廢墟。我哋從呢幅畫著手創作主旋律。」而Mischa希望做到的史詩式感覺,三位合作夥伴同時肩負起編曲的責任,一個負責電結他和鋼琴,一個負責和風弦樂,一個負責鼓組和敲擊樂,以三個不同的角度切入,再加上充滿現代感的史詩電影音效,令〈史詩式完結〉富有和風味之餘,整體音樂既可以安靜又可以大型 ,同時保持到美感與張力,再加上由寫Demo開始已存在的一句「Goodbye」歌詞,令〈史詩式完結〉籠罩著盪氣迴腸、圓滿謝幕的氛圍。


MV 方面,今次〈史詩式完結〉亦同樣於日本拍攝,講述Mischa飾演的女神Freya與武士Hades的回憶:Hades教導Freya揮刀出絕招火刀的往事,當中穿插〈人間英靈〉的終極一戰,Freya如何用同一招將Hades擊敗。製作團隊在日本當地找來一個廢墟,以呼應寫歌時取得靈感的畫作,除此之外,又找來日本火藝師宮窪研拍攝,並在他工作坊附近的湖泊拍攝揮刀的鏡頭。看著宮窪研於現場舞動火刀,Mischa驚嘆道:「喺現場宮窪研舞動火刀嘅時候,我哋現場所有人都被震懾,個個都嘩嘩聲!因為佢完全唔驚把火刀,人刀合一不停揮動嘅畫面極之靚,完全駕馭把刀!」Mischa在MV中亦有舞動火刀,但卻不慎燒傷手,她回想起道:「因為風向問題,我燒傷咗右手手背,當時好痛,但現場都有急救準備,即刻用大量嘅冰敷,但冰到我痛!司機好好買咗燙火膏俾我厚敷,好彩最終冇留疤,最後亦無事。」由於拍攝當日風向不停轉換,除了Mischa受傷外,拍攝隊為了拍攝一個直插入火燄的鏡頭,將航拍機直駛入火燄裡面,最後航拍機都燒溶了,但Mischa道:「其實我哋都預咗犧牲航拍機,但部機衝咗入火堆裡面之後,就跌咗落河入面,我哋以為冇事,但後來發現,部機係溶咗!」航拍機燒溶了,但換來一個極度震撼的畫面,製作團隊都覺得十分值得,Mischa更直言團隊眾人都十分熱血,十分有型呢!



來到《The Odyssey of Freya》音樂企畫的最後一首歌,Mischa坦言十分不捨,但同時表示:「終於完結,好唔捨得,因為好似發咗一場一年半嘅夢,一路去自製一個好入迷好喜歡嘅虛擬世界,但亦好開心佢完結咗,有好實在嘅實體碟攞上手,呢份係一份好好嘅禮物,而且有好好嘅作品同MV流傳喺網絡上面,好感恩身邊有一大班人咁支持我個夢想, 要做呢一件事唔簡單,而家終於完成咗,實在好感激大家。」而為了貫徹整個音樂企畫的概念,於今日推出的專輯《The Odyssey of Freya》,除了以Box Set形式包裝,猶如Mischa最愛的電玩遊戲《Final Fantasy》系列的設計外,隨碟亦像一般電玩遊戲附送繪本,並由填詞人林寶特別為五個角色:Freya、Eris、Aphrodite、Morbus及Hades創作短篇故事,再加上插畫家小萊的插圖,讓樂迷可以藉著文字,更深入了解《The Odyssey of Freya》整個故事。




葉巧琳〈史詩式完結〉MV將於今晚9時於YouTube首播

https://www.youtube.com/watch?v=Hw9zIrwlvkQ

152 次查看
bottom of page