按摩椅品牌ITSU邀得「絕世荀盤」馬國明擔任香港區代言，早前他為品牌拍攝廣告及宣傳照，坐於按摩椅準備拍攝的馬國明，笑話：「我仲以為呢個廣告好輕鬆，而家要忍住唔好瞓著，我好驚自己瞓著咗。」
拍攝當日，馬國明剛從劇組收工便緊接拍廣告，但表現完全無疲態而且相當專業，不少鏡頭只拍了兩、三take便完成，過程相當順利。問他是否密密接job儲老婆本？馬國明直言做演員，除了拍劇，最好的收入來源便是廣告及登台，因此無任歡迎，亦不介意與湯洛雯「夫妻檔」上陣：「我同阿湯（湯洛雯）好似未試過一齊拍廣告，其實咩產品都無所謂，咩產品我哋都可以拍嘅，總之抵用啦。」
對於這次獲按摩椅品牌邀約，馬國明表示相當興奮，因為自己平日亦喜歡按摩，特別喜歡是次廣告中ITSU SENSEI ESSENCE Neo V3的翻轉膝蓋按摩設計：「大家都知我鍾意踢波，對腳好攰，所以有得翻轉按膝頭好好，然後再按埋大腿同小腿，真係好啱我。」他提到未婚妻同樣是愛按摩之中：「阿湯（湯洛雯）都鍾意按摩，我哋平日會請人返嚟屋企按，不過人哋未必次次都得閒㗎嘛。屋企有張按摩椅就好啦，廿四小時都有得按，我哋就算凌晨收工返到去，嘆返半個鐘，真係好方便。尤其我哋呢啲收工無定時，佢廿四小時stand-by喺度就最好啦。」
他大方分享同居生活，平日與靚湯亦不時互相按摩：「因為我條頸成日都好攰，佢都會幫我按吓條頸，咁我又幫佢按吓膊頭咁囉。佢開工好攰我就幫佢按，或者我開工好攰，返到去佢又幫我整兩嘢咁。」兩小口子認真甜到漏。
對未來太太寵愛有加的馬國明，已即時買了按摩椅，讓對方可以好好享受。母親節將至，他有意再買兩張，一張送予父母，另一張送予靚湯的父母：「我爹哋媽咪都好鍾意按摩，呢個係好好嘅禮物，佢爹哋媽咪都有需要，所以一買要買多兩張，三個地方都有就最開心，去到邊都有得按。而家諗送禮都唔會淨係諗自己屋企，都會諗埋佢爹哋媽咪，好多禮物都預個double，所以開支都大咗，拍多啲廣告梗係最好啦，甚至我哋可以一齊出活動呀，一齊登台都得㗎。因為佢好鍾意去旅行，可以一齊拍旅遊節目呀，呢個就等公司安排，可以寓工作於娛樂。因為呢排我又要宣傳又要拍劇，都唔可以好早返屋企，佢自己喺屋企都悶，如果可以一齊開工陪吓佢，見多啲就最好。」