top of page

KC X Tsoul為推動香港跳舞文化走上幕前以首支跳舞MV《GET SILLY》作起步提高舞者地位

夢想成為跳舞明星,將跳舞文化在香港推廣普及的KC x Tsoul終於踏上了他們追夢之旅!而二人繼出道記者會第一次合作公開跳《GET SILLY》,再看到跳舞MV片正式出街,片尾慢鏡逐一出每位dancers名介紹,KC同Tsoul終於感覺真實,說:「香港dancers好多時被忽略,而我哋想做跳舞明星,唔係想話要做到似邊個?或者要搵到幾多錢!我哋只係想透過今次機會,做到自己鍾意嘅嘢、又可以推動到香港跳舞文化。所以當見到公司俾我哋MV逐一出dancers名、仲有好大隻字,配埋慢鏡俾佢哋,同一般出dancers名好唔同時,真係好開心,感覺做到想做嘅事,今日做到一小步,明日至有機會有一大步。」


KC同Tsoul跳舞企劃第一擊《GET SILLY》跳舞MV已正式上架,當中KC找來WinWin排舞、並與四位dancers Kahay、Jasper、Athena及Siu Yee Yau 先後在花園街、汀九等街頭跳舞、Tsoul則由KaKa排舞,並與另外三位dancers兼教他跳popping的老師 Louis、Lyle、Bobby在銅鑼灣鬧市、灣仔海旁等跳,以透過香港景帶出貼地感覺; 而在兩位排舞師努力下,尾段兩組一齊合跳推高氣氛,Tsoul說:「《GET SILLY》算係一大突破,跳自己嘅歌,有跳舞MV、仲有兩種唔同舞種融合,證明香港係可以唔同舞種一齊跳,然後have fun同get silly,」KC補充:「過去拍跳舞片,大家係跳舞圈內嘅人留意,無諗過宜家做嘅嘢可以俾更多人睇,呢個係我哋想做嘅目的,更希望跳舞片同時可以令唔喜歡跳舞嘅人喜歡跳舞,感受到我哋喜歡跳舞原因。」


《GET SILLY》雖然是跳舞MV,但歌曲班底一樣強勁,由JNY監製、Rouno、SQVARE及AVENUE 52作曲、T-Rexx填詞,歌詞是二人寫景,包括形容了Tsoul之前返寫字樓,以賺錢跳舞的一句「如果跟跟格式去做,辧公室機器沉悶到,Get Silly」,KC的「永遠冇怕過會跌會痛會尷尬,個個計算算數當我蠢人」,而最重要一句是二人跳舞宗旨「係做要認,好玩於終點不確定」,所以透過今次的歌《GET SILLY》,KC同Tsoul鼓勵大家不但是舞者,其他人都要像二人一樣要勇於為夢想踏前,因為去年就因一下衝動踏出參加了《造星》,今日至有機會做自己想做的事。


至於在出道記者會上 KC同Tsoul沒有唱只是跳,是因為二人演出都會專注在跳舞為主,就好像出道記者會上,二人的演出是最炸台,比拍MV及排練時更好。力量就是源於現場氣氛,台上每位舞者,Tsoul說:「果刻完全感覺到與KC相連,大家愈跳愈有,好爽!所以跳完第一時間大家攬咗一下,而識唱一齊跳係我哋嘅口號,因為現階段表演會以跳舞和編舞為先,好像外國好多跳舞明星一樣,跳自己歌時都不一定唱,希望這種文化亦可以慢慢令大家認識。」現時《GET SILLY》正進行dance challenge, KC同Tsoul歡迎大家跟住跳, 甚至是free style, 再上載分享,記得tag #getsillydancechallenge, tag KC同Tsoul, 一齊 GET SILLY。



KC & Tsoul 的首支跳舞MV《GET SILLY》已於 Dance First YouTube Channel推出。


Dance First YouTube Channel – https://www.youtube.com/@Dance_First

《GET SILLY》Dance Video 傳送門:https://youtu.be/N5GfLADAaYE?si=adCFkzgSI85ZDYZk

135 次查看

Σχόλια


bottom of page