top of page

李駿傑開Show前夕推新歌〈Fever〉MV意識大膽畫面惹人遐想

李駿傑(Jeremy)首個個人演唱會《網上行夢想系MOOV LIVE JEREMY》將於8月30日舉行,演唱會舉行在即,Jeremy乘勢推出最新單曲〈Fever〉,唱出熱戀中心情,MV則意識大膽,畫面帶點火辣,跟Jeremy平時純純的個性截然不同。



Jeremy今年推出的個人單曲全都是情歌,當中主題愈玩愈激,新歌〈Fever〉就由T-Ma監製、T-Ma、Patrick Yip、Lincoln LamPurpleNacho及Teresa Tseng作曲,梁栢堅填詞,唱出一個人熱戀中的感受。Jeremy介紹道:「〈Fever〉係講鍾意一個人就會鍾意到好似發燒咁樣,一諗起佢就會發燒好熱,日日都好掛住佢好想同佢繼續喺埋一齊嘅感覺。今年想有一首有熱戀階段感覺嘅歌,希望大家可以透過呢首〈Fever〉,可以感受到熱戀當中嗰種興奮開心。」



這次以全新班底合作,Jeremy自言都幾新鮮,同T-Ma及梁栢堅的合作都有意想不到的順暢,他說:「一直都有聽過了解過T-Ma同梁栢堅嘅作品,當可以真正合作自己都好期待。同T-Ma傾時都好順利,佢都好明白我想要啲乜嘢,好快可以俾到Demo我,我都好鍾意。至於梁柏堅亦好快寫好成份歌詞,寫之前我特登同佢講話可以寫得直白啲,唔使咁文青,因為知佢嘅詞不嬲有一種瀟灑喺入面,今次〈Fever〉都有呢種感覺。」


歌詞火辣,沒想到MV一樣讓人看得熱血沸騰。今次MV是跟上回〈You First〉同步在台灣拍攝,同樣由台灣YouTube Channel「這群人TGOP」的小宮擔任女主角,這全因當時已在準備〈Fever〉一曲,所以就順勢都在台灣拍MV,而且Jeremy很想試試跟台灣團隊合作,結果就一口氣完成了兩個MV。上回與對方扮演恩愛情侶,今次則是含羞答答的帥哥遇上熱情如火的美少女,MV中小宮走進房中換衫,剪影下見到她脫下身上的衣服,更拋出房外到Jeremy眼前,畫面令人有無限遐想,就連Jeremy自己都說:「今次一啲鏡頭係比〈You First〉更大膽,都係第一次MV上有咁嘅嘗試,好在拍時已經係開咗幾日工,小宮又係一個好開朗嘅人,好外向好Friendly,熟咗之後就好啲,只係有少少尷尬。」


〈Fever〉選擇在演唱會前夕推出,Jeremy笑言:「演唱會咁重要嘅時刻,梗係要賀一賀佢啦,同埋我都好想可以喺演唱會上唱多啲自己嘅歌,等大家可以更加了解我唔同嘅色彩,而〈Fever〉十分適合今次喺舞台上完整地表演俾大家睇,所以就揀喺演唱會前出歌喇!」現時演唱會已準備得七七八八,此刻Jeremy心情複雜,他說:「仲有一日排舞入台就真係正式Show,心情好緊張好期待呢一日,但又少少唔捨得咁快嚟到8月30號,希望嗰日可以Good Show!」在這個重要日子的來臨,Jeremy也特別留言給Unicorns道:「好多謝大家一直都咁期待呢個演唱會,都希望俾到大家最好最完美,令大家難以忘記嘅演唱會,希望可以做到我自己心目中嘅100分演唱會,大家可以留下美好回憶!」


李駿傑〈Fever〉MV現已於Mirror YouTube Channel推出。




269 次查看

Comentarios


bottom of page