top of page

五位歌手加入全新音樂廠牌Green Music

Green Music 是Sony Music HK旗下的全新音樂廠牌,致力為香港本地音樂注入清新的新力量,讓香港廣東歌突破固有的想像!身為Green Music主腦人的Bert Liu,在記者會上分享道:「Green Music會搵一啲新嘅製作人,佢哋願意為Cantopop投入一啲新嘅元素,希望可以帶多啲周邊城市唔同地方嘅音樂人,為Cantopop而貢獻。」而首批加入Green Music的音樂人包括:JB、King、力臻、CotaBoii (aka Taco)及Cheeseekit,當中CotaBoii (aka Taco) 將會成為首位推出歌曲的歌手,於2024年1月1日推出新歌。






眾人當日在記者會過後,更作現場演出,其中Cheeseekit即席Freestyle盡顯功架,力臻以招牌靚聲演繹他的Citypop作品如〈Ain’t No Party〉、〈都市爬行〉等,令人聽出耳油,CotaBoii (aka Taco) 除了與Paula合唱〈甩身〉外,他亦首度公開獻唱即將派台的單曲〈Mr. Nobody〉,讓樂迷見識他的其他音樂面向。


JB亦唱出新作〈Me and my crew〉,在MV中加入跳舞元素的他,在演唱時跟隨拍子舞動,迅即炒熱現場氣氛。一直以DJ KING身分闖蕩樂壇的KING,都有在現場打碟,令K11 Art Mall的露天廣場變成大型舞池,現場樂迷齊齊跟著音樂節拍舞擺,氣氛高漲,不過久未作個人演唱的他,連續演繹〈天梯〉、〈直到你肯定〉、〈薄情歌〉外,更與陳柏宇合唱〈留下來的人〉,其超水準演出,令Jason都讚口不絕,更搞笑道:「你唔可以唔唱歌,因為你得天獨厚,你有啲成個香港樂壇嘅歌手都冇嘅聲音同音域,如果你有埋我個樣就天下無敵。」KING聽到Jason的話,也笑言:「一定係啦,所以我哋要多啲黐埋一齊。」


演出過後,KING開心表示:「一開始好緊張,但係好激動,因為重新揸返支咪去唱歌,而唔係嗌咪叫大家Put Your Hands Up,嗰個感覺係既熟悉但又有啲陌生,唱唱下就發覺,我都幾Enjoy,可能平時台下練習,都冇咁嘅感覺,但一見到有觀眾,感覺就出返嚟,希望之後愈唱愈好。」KING亦透露:「2024年會出歌,同埋應該會出一隻碟,3月會出韓國團隊做嘅歌,因為我都幾鍾意韓式慢情歌,嗰種感覺、節奏好Touching,都想試下韓式歌風配上廣東歌詞會係乜嘢感覺。」至於成為Green Music首位推出單曲的歌手的CotaBoii (aka Taco) 則坦言:「有少少受寵若驚,新歌〈Mr. Nobody〉嘗試咗新曲風去面對主流觀眾,反應會係點,我都好期待。」



至於跟CotaBoii (aka Taco) 同樣來自Rap Crew「Special Plan」、現就讀中六的應屆DSE考生Cheeseekit,在商場Freestyle一番,他開心道:「今日俾我感覺係,音樂喺香港真係仲可以Do Something,唔係話啲歌寫得幾好都唔可以感染到人,其實今次表演一開始都有失誤,但後面唱好返反應都好好,令我嘅信念又揸實返少少。」而一直以獨立歌手作發展的力臻,對於加入Green Music,他表示:「我覺得唔係太大轉變,都係繼續可以做自己想做嘅音樂,但可能多啲Support,多啲資源可以更加放。」JB亦認同道力臻的講法,覺得日後創作的想像可以更加廣闊,他說:「〈Me and my crew〉個MV已經加咗跳舞元素落去,2024年我可能會向呢個方向再做多啲。」



而昨日來到最後一天的音樂派對,多位歌手以不同方式作音樂交流,驚喜不斷!例如:力臻 x Michael C.一同自彈自唱〈漂流教室〉,然後再孖黃妍Cath演繹〈天光前〉,前者感覺柔情,後者能量滿載,樂迷都一樣聽得入神。然後葉巧琳Mischa遇上KING與CotaBoii (aka Taco),三人將宇多田光為動畫《新世紀福音戰士》獻唱的〈One Last Kiss〉重新編曲,加入KING的EDM和CotaBoii (aka Taco) 的Rap,再由Mischa主唱,頃刻為歌曲注入了截然不同的力量,而KING與力臻唱出充滿冬日感覺的〈留下來的人〉,跳脫的編曲與演繹,就像與現場樂迷預祝聖誕。壓軸登場的陳柏宇,除了演繹即將推出的大碟《in Rhythm》中的作品包括:〈一人傍晚藝術館〉、〈懷舊是一種品味〉等歌曲外,他亦與Cath、Mischa及Michael C.合唱〈有我〉,以最溫馨的方式,為整個《Artisans Never Stop by Sony Music》活動,畫下完美句號。



有份參與最後一場音樂派對的Mischa能夠跟KING合作,她興奮道:「我自己好喜歡同King嘅Crossover,尤其是將〈One Last Kiss〉再Remix做咗一個Live Version,仲加埋CotaBoii (aka Taco) 嘅Rap入去,係好正!希望將來真係可以同King合作,出啲EDM音樂。」至於同樣有份與KING合作的Jason,則道:「King係超勁,好高音,但最犀利係佢有埋低音,可以同佢一齊唱下歌,真係覺得榮幸!」


124 次查看
bottom of page