top of page

ERROR〈四五成群〉唱出最赤裸兄弟情 成軍五周年 邀300 Fans一同拍攝MV 《全民造星》參賽號碼神預言各成員命運

不經不覺,宇宙天團ERROR已經成軍五周年!為咗慶祝這個大喜日子,肥仔梁業、何啟華DEE、郭嘉駿193及吳保錡Poki與團隊花盡心思大搞慶祝活動外,亦灌錄了新歌〈四五成群〉,並邀請了300 Fans一同拍攝MV,場面墟冚!


〈四五成群〉由陳考威、黃兆銘作曲,梁栢堅填詞,旋律溫馨,但歌詞就寫盡ERROR四子之間最赤裸的兄弟情。193回想起搵梁栢堅填詞的原因道:「啱啱出完台灣Trip,阿濟問我哋搵邊個寫詞好,突然諗起喺台灣同梁栢堅打咗兩次邊爐,又諗起當年幫我哋寫〈我們很帥〉,嗰陣我哋出道咗年幾兩年,都已經好了解我哋。」肥仔都十分認同,道:「唔知點解梁栢堅好熟悉我哋,呢度入面好多都係我哋親身經歷,應該成日靜靜雞J我哋。」阿DEE亦認同道:「其實係俾功課考下栢堅,諗住睇下佢幾了解我哋,點知真係寫得出。」歌詞當中就連去廁所、發脾氣等內容都有,十分到肉,至於邊句講邊個,大家都表示唔開名,聽到邊個唱,就一清二楚了!

MV方面,今次〈四五成群〉特別選址在充滿情懷的寶石戲院內拍攝,原來是阿DEE提出的,他說:「唔知點解當時諗到喺寶石戲院,可能因為罕有,唯一仍在保育嘅戲院,所以趁我哋成軍五周年,仲有得拍就拍咗先。其實今年我哋拍咗部電影〈陰目偵信〉,一出擊就滿城話題,用返戲院做我哋今年嘅總結都唔係壞事,不過認真講,戲院象徵一個舞台,我哋想搵個舞台,又坐到觀眾,但又要有入場感覺,所以就揀咗戲院。」MV中其中一幕是坐爆戲院,ERROR所以號召了300 Fans一齊參與拍攝,肥仔道:「搵埋Fans一齊拍呢個五周年MV,就有種與眾同樂嘅感覺。」阿DEE也坦白道:「五年前我哋Call唔爆一間戲院,而家幾間都應該可以,所以都要同大家講聲,I Love You Guys!!」193亦道:「多謝你哋不離不棄,咁多選擇都選擇我哋。」肥仔也表示:「有你有我。」DEE也接著表示:「今日拍MV都辛苦大家。」但一說起拍攝,193就說:「因為Delay咗少少,要佢哋喺外面等咗個幾鐘。」怎料Poki爆料:「因為我有個朋友遲到囉。」至於誰遲到?大家經討論得到的總結是:沒有人遲到啊!



除了Fans加入拍攝,今次四子的造型也花了心思,在西裝上加入了大家在《全民造星》時的參賽號碼繡章,勾起了大家很多辛酸又難忘的日子,但估不到這些號碼都是神預言!Poki道:「睇返原來唔係好意頭,58即係唔發,同我而家經濟狀況一樣,發唔到。」DEE亦說:「呢個冧把就係當年公司對我哋嘅期望,咪就係又七又死囉!」肥仔的冧把,就預言了他們的歌曲名字,他說:「我45咪就係今次首歌〈四五成群〉囉!」至於193的26號,Poki迅即聯想到,大叫道:「咪二打六囉!」看著各人的參賽號碼,193得出了結論:「照咁睇,公司對肥仔喺Day 1嘅加入已經有安排,你同DEE兩個Eye Catching Idol有特別待遇㗎!」Poki也和應道:「我哋喺後面幫你哋做Dancer咋!」肥仔不甘示弱,反擊道:「你諗下你當年跳成點先啦!」Poki與193都自信滿滿的表示: 「我跳得好好,到而家都覺得自己跳得好好,冇問題!」但DEE認真表示:「其實Eye Catching Idol係我自己努力返嚟。」Poki即大爆:「都係嘅,佢當年只係著條Legging出嚟,好鬼Eye Catching。」不過193很感恩,這五年裡DEE作出了重大改變,道:「五周年最大改變就係阿DEE著Legging會著返條褲喺面。」

瘋狂的說話講好多,但四子其實都有些心底話,想趁五周年分享一下:

肥仔:

五周年,兄弟們,食屎啦!因為屎都食過先係真兄弟,我哋四個曾經一齊共過患難,乜嘢屎都一齊食過,經歷過咁多嘢,咁先係最真嘅兄弟,喺我心入面係不能沒有你哋。


DEE:

都冇咩想同兄弟講,都有排對,反而想同Fans講,但只代表個人立場。大家都知我鍾意做戲,音樂上面冇乜野心要去追求,但每次見到你哋推到我哋入去一啲要投入嘅五強,都有種感動。我哋堅持就應該,因為做緊呢份工,但你哋都咁堅持,真係多謝你哋,都唔知可以點。未來我哋仲有好多日子一齊行,大家一齊努力加油,我哋會令更多鍾意ERROR嘅人Proud of Us,鍾意ERROR係有品味嘅象徵,我哋會繼續往呢個方向進發。


193:

多謝一直嘅陪伴,我呢啲咁任性,成日搞事嘅人都會成日惹到麻煩俾佢哋,多謝佢哋嘅包容,咁快就五年,希望大家都有下個五年,就一定有嘅,因為我哋都簽咗好長嘅約,但係下一個五年就未必有下一個五年了,所以大家好好珍惜,希望到時60歲我哋仲可以開到紀念演唱會,希望到時仲有Fans揸住枴杖嚟睇我哋。


Poki:

同ERROR兄弟五周年,好開心大家經歷咗咁多嘢,拍咗咁多好嘅節目。未來五周年,大家都應該係一個叔叔嚟喇,希望大家注意身體健康,盡量跑多啲步,到時肥仔都變返瘦仔,DEE哥變大隻DEE,193就非常完美唔使改喇,搞掂!


ERROR〈四五成群〉MV現已於ERROR YouTube Channel推出。

ERROR YouTube Channel - https://www.youtube.com/c/ERRORweare

236 次查看
bottom of page