top of page

ERROR唱出枱面枱底愛情關係圖 2023年首支派台作品〈枱底隧道〉MV送驚喜 孫佳君獲邀首參與演出 大跳性感椅子舞


今年一直未有推出單曲的宇宙天團ERROR,於今日終於推出新歌〈枱底隧道〉,唱出他們一貫與別不同的愛情觀,今次MV更找來重量級女主角孫佳君參與演出,這份驚喜,就連ERROR也始料不及呢!

〈枱底隧道〉是何秉舜及黃偉文繼〈愛情值日生〉及〈Never Come Back〉後再次為ERROR創作的作品,而歌詞構思全由Wyman發辦,肥仔道:「你都知ERROR嘅愛情觀係幾Error㗎啦!不嬲都係會宣揚愛情,但會係點樣嘅愛情觀,就大家自己去諗了。」〈枱底隧道〉嘅愛情世界,可以用一場常見的劇情說出來,肥仔介紹道:「一班人食飯,枱面大家喺度傾偈,但枱底啲腳就係到互相撩緊對方,〈枱底隧道〉講緊一啲好奇怪嘅關係,大家明明互相相識,但唔知點解你係會有啲鮮為人知嘅秘密,然後對方知道嘅時候,就會顯露出奇怪嘅曖昧眼神。」

要有愛情戲份,當然要有好的對手,今次MV導演是曾執導《流氓師表》的麥啟光,他找來近年鮮有在幕前演出的孫佳君擔任MV女主角,而ERROR四子在拍攝前一晚才知道有對方的參與,Poki說:「第一次聽到孫佳君有份參與梗係呆咗啦,因為不嬲都係有睇開佢啲戲,同埋佢真係好靚,嗰個年代嘅美人,而家呢個年代睇都係好美,嗰個靚唔係可以用筆墨可以形容到。」Poki一直大讚孫佳君好靚,但肥仔卻踢爆道:「我哋以前成日會睇孫小姐嘅作品,但poki最厲害,不停講孫小姐嘅作品,但全部錯晒,人哋冇乜過嗰啲全部都噏晒出嚟,但其實都唔係,嗰個Moment笑到暈低。」Poki聽到也搞笑說:「我成日都以為佢同劉嘉玲係同一個人,都有少少尷尬,不過咁樣氣氛反而快熟咗,而且可以同到前輩熟咗,仲同佢交換咗IG同電話有傾有講

可以同到唔同嘅前輩學習到佢嘅嘢,好開心!可以幫到自己喺呢個行業行走落去。」Poki更是四個之中第一個向孫佳君抄牌的人,他說:「一定係第一個抄佢牌,因為真係好靚,就係咁簡單。」


首次參與MV演出的孫佳君,今次不單是演戲,還有高難度性感Chair Dance,肥仔知道後都大吃一驚,他說:「孫小姐跳之前都唔知佢會跳一Part性感舞步,佢跳緊嘅時候,我哋只知到佢拍嘢但唔知拍乜,仲喺化妝間休息緊,我哋知得太遲。早講嘛!如果唔係一早衝咗埋去睇啦大佬,導演又係,自肥又唔講聲。」至於今次為ERROR破格演出的孫佳君,對於今次舞蹈演出都有備而戰,她說:「今次拍攝前淨係同排舞老師跳咗個半鐘。本來佢話拍攝嗰日佢會落嚟,但係點知嗰日因為做嘢都落唔到嚟,我都好驚跳得唔好睇,同埋今次係跳Chair Dance, 我哋排舞嗰陣時張櫈唔係現場嗰張,排嗰陣時嗰張細好多跳起来其實容易好多,拍攝嘅時候嗰張櫈高啲大啲所以係難咗,好彩我喺疫情期間有跟Sunny Wong學跳舞。所以都過得去。我未睇個MV,希望大家唔好笑我跳得唔好,哈哈!」



對於今次同ERROR四子合作,孫佳君表示:「同佢哋4個合作,感覺年輕咗,佢哋好可愛,好有Energy又不停講笑,好得意呀佢哋。其實我一直都好想參與MV演出,多謝導演嘅邀請,能夠同四個咁勤力又可愛嘅年青人合作,好Lucky,亦係好難忘嘅體驗。」



ERROR〈枱底隧道〉MV現已於ERROR YouTube Channel推出。

ERROR YouTube Channel - https://www.youtube.com/c/ERRORweare





128 次查看

Comments


bottom of page